Skák bara fyrir stráka?

Á föstudaginn ætla ungir skákmenn í Taflfélagi Vestmannaeyja að reyna að tefla samfleytt í 24 klst í fjáröflunarskyni.  Taflfélagið hefur staðið fyrir mjög öflugu starfi í Eyjum og margir af bestu skákmönnum landsins á aldrinum 6-13 ára er frá Vestmannaeyjum.  

Dóttir mín er ein þeirra sem hafa verið að mæta á æfingar hjá Taflfélaginu og mun mæta til að tefla á föstudeginum.  Mætti hún heim með blað þar sem bæjarbúar voru hvattir til að mæta, tefla við skákmennina ungu og heita á þá ákveðinni upphæð. Því hikstaði ég aðeins þegar ég las eftirfarandi setningu: "Eru bæjarbúar hvattir til að kíkja á skákstað og tefla við strákana.  Með undirskrift minni heiti ég á drengina..."

Síðan heyrði ég í einum forráðamanni skákfélagsins og þá kom að sjálfsögðu í ljós að þetta voru bara mistök. Í samtali okkar veltum við líka fyrir okkur hver er ástæðan fyrir því að stúlkur eru mun færri í skákklúbbum en strákar.  Skyldi það vera sama ástæðan og að strákar eru mun færri í fimleikum og ballett? Af því að við foreldrarnir (eða jafnvel mæðurnar) veljum fyrir börnin okkar og veljum í samræmi við mótaðar hugmyndir okkar um hvað sé gott fyrir stráka og hvað sé gott fyrir stelpur.

Ég veit allavega að ég vil að dóttir mín haldi áfram að tefla því það er skemmtilegt, krefst hugsunar og einbeitingar og getur nýst henni vel í námi og starfi í framtíðinni.

Því segi ég að skák á að vera jafnt fyrir bæði stelpur og stráka, - alveg eins og fótboltinn, tennisinn og ballettinn.

Athugasemdir

[Steini Briem (IP-tala skráð) 22.2.2007 kl. 17:45]

Ég vona að dóttir þín taki sér Guðfríði Lilju Grétarsdóttur til fyrirmyndar, alla vega í skákinni. Blink blink! Áfram stelpur! 

[Eygló Þóra Harðardóttir, 22.2.2007 kl. 17:49]

Allt er vænt sem vel er grænt

[Steini Briem (IP-tala skráð) 22.2.2007 kl. 20:50]

Grænt, grænt, grænt
er grasið úti í haga.
Grænt, grænt, grænt
er gamla pilsið Jóns.
Allt sem er grænt, grænt
finnst mér vera fallegt
á hann Jón Sigurðsson.

[Jóhanna Fríða Dalkvist, 22.2.2007 kl. 22:15]

Held að það sé bara staðreynd að stelpur hafa bara ekki eins mikinn áhuga á skák og strákar. Las einhverntíma grein um það að skákin væri á svipuðu sviði og verkfræði, stærðfræði og þess háttar og því væru strákar fjölmennari í skákinni, því þetta allt er meira á þeirra áhugasviði og ekkert óeðlilegt við það, við erum bara ekki eins og eigum ekki að reyna að vera það.

Ég tefldi sjálf einu sinni og geri örsjaldan enn (tefldi meira að segja nokkrum sinnum við Guðfríði Lilju ), hef líka alltaf haft gaman af stærðfræði, tók hluta af rafvirkjun og ætlaði í verkfræði á sínum tíma. Með framhaldið síðar meir þá gefa konur sem tefla sér kannski ekki jafnmikinn tíma og karlarnir í að sinna því, kannski hafa þær bara áhuga á svo mörgu öðru. Þegar allt kemur til alls eru ekki einu sinni svo margir fullorðnir karlar sem tefla.

Einn góður íslenskur skákmaður sagði fyrir mörgum árum um erlenda skákkonu, sem mig mynnir að hafi unnið hann, að hún hlyti að vera með karlmannsheila. Hann var reyndar ekki svo góður í mínum huga eftir það, því ef konur sinna þessu jafnvel og karlar geta þær verið jafngóðar, bara einstaklingsbundið.

Vona að dóttir þín haldi áfram að tefla. 

[Pétur Þór Jónsson, 23.2.2007 kl. 00:00]

Krakkarnir verða nú að reyna með sér sitt í hvoru lagi, annars er nú skákin sú íþrótt sem kynjunum er ekki mismunað, ekki vildi ég sjá t.d. karla og kvennalið reyna með sér í hand eða fótbolta svo eitthvað sé nefnt, en samt um að gera að finna íþróttir þar sem þau keppa sem jafningjar.

[Steini Briem (IP-tala skráð) 23.2.2007 kl. 01:30]

Guðfríður Lilja er náttúrlega komin með með Vinstri grænan heila en hún er varla með karlmannsheila. Til þess þyrfti hún að vera karlmaður. Konur voru síðastliðið vor 64% af nemendum Háskóla Íslands. Voru karlarnir í skólanum þar af leiðandi með kvenheila, líka karlarnir í raunvísindadeildinni sem voru um 40% af nemendum deildarinnar? Þarfnast raunvísindi ekki fyrst og fremst rökhugsunar, eins og skákin? Það þarfnast hins vegar þjálfunar að verða góður í skák og raunvísindum. Enginn verður góður í nokkrum hlut án þjálfunar og áhuga. Við höfum ekki áhuga á öllu og þurfum oft hvatningu til að verða góð í því sem við höfum áhuga á. Þessa hvatningu hafa stelpur ekki fengið í nægilega miklum mæli í skákinni og nú er talað um að hvetja þurfi karlmenn til að fara í háskóla. Flestir skákáhugamenn, bæði karlar og konur, hafa áhuga á alls kyns hlutum öðrum en skákinni og ég veit ekki til þess að Guðfríður Lilja hafi hætt að tefla, enda þótt hún hafi fengið áhuga á pólitík. Og konur í pólitík hafa varla lagt alla aðra hluti en pólitíkina á hilluna.

[Karl Gauti Hjaltason, 23.2.2007 kl. 17:58]

Taflfélag Vestmannaeyja rekur öflugast barna- og unglingastarf á landinu í dag.  Þar æfa u.þ.b. 50 krakkar reglulega skák, bæði strákar og stelpur og þar á meðal dóttir þín sem er yndisleg.  Það tekur auðvitað tíma að byggja upp góða skákmenn, en við reynum að vinna þetta markvisst.  Það má vel vera að nauðsynlegt sé að reyna að hvetja stúlkur til að stunda skák í meira mæli en raun ber vitni, en það er þó alltaf einstaklingsbundið á hverju þú hefur áhuga.  Guðfríður Lilja hefur hvatt stúlkur áfram til skákiðkunar og e.t.v. mun það skila sér þegar lengra líður.  Sumir setja stórt spurningamerki við sérstök stúlknaverðlaun í þessari íþrótt.  Er það eðlilegt?  Verður það til þess að stúlkurnar leggja sig harðar fram eða er það til þess að þær fara að setja markið lægra og sætta sig við að standa drengjunum að baki?  Þetta eru spurningar sem við þurfum að spyrja og svara áður en lagt er af stað við barnastarf í skák.  Við hjá Taflfélagi Vestmannaeyja höfum talið að kynin standi jafnfætis í þessari íþrótt, strákar og stelpur tefla saman og keppa á jafnréttisgrundvelli. Auðvitað væri æskilegt að fleiri stúlkur iðkuðu skák og öll góð ráð eru vel þegin í því sambandi, en ég er þó þeirrar skoðunar að ekki á að bjóða þeim sérstakan getuafslátt.

[Steini Briem (IP-tala skráð) 23.2.2007 kl. 19:25]

Enda engin ástæða til, Karl Gauti. Við erum ekki að tala hér um líkamsburði. Í skákinni geta strákar og stelpur lært að bera virðingu fyrir hvert öðru. Þetta er góður félagsskapur, laus við drykkju og dóp, og það getur verið meiri lærdómur fólginn í því að tapa og gera mistök en að vinna allar skákir. Það á alls ekki að vera aðalatriðið. Og að brjóta heilann í skák þroskar minnið, bætir námsgetu og hjálpar til við að finna réttu leiðina að ákveðnu takmarki eða markmiði.