Lengt í hengingarólinni

Ríkisstjórnin kynnti í gær nýjar plástursaðgerðir fyrir heimilin í landinu.  Nú er ætlunin að hækka viðmiðunarfjárhæð vaxtabóta um 25% og breyta gengistryggðum fasteignalánum í hefðbundin verðtryggð lán. 

Á sama blaðamannafundi kom fram að skv. tölum Seðlabankans eru um 30.000 heimili með neikvæða eiginfjárstöðu, eða nánast.  Að vísu á enn eftir að reikna aðrar skuldbindingar s.s. bílalán og yfirdráttarlán sem voru um 75 milljarðar í janúar 2007.  Einnig mætti einhver góður blaðamaður spyrja við hvað miðast verðmatið á eignunum? Fasteignamat, brunabótamat eða markaðsvirði?

Benedikt Sigurðsson, framkvæmdastjóri Búseta á Norðurlandi, bendir á að aðgerðirnar geri lítið fyrir fólk sem búi í mjög skuldsettu húsnæði. Fasteignirnar seljist ekki og því er ekkert raunverulegt verð til á þeim. Eina raunhæfa aðgerðin til bjargar er að lækka höfuðstól lánanna.

Þetta er nákvæmlega sama og John D. Geanakoplos og Susan P. Koniak segja í leiðara í New York Times um heimilin í Bandaríkjunum.

Geanakoplos og Koniak skrifa: "An avalanche of foreclosures is coming- as many as eight million in the next several years.  The plan announced by the White House will not stop foreclosures because it concentrates on reducing interest payments, not reducing principal for those who owe more than their homes worth. The plan wastes taxpayer money and won´t fix the problem."

Áherslur íslensku ríkisstjórnarinnar eru einmitt á vaxtabyrðina, dreifa greiðslubyrðinni yfir lengri tíma og fella niður skuldir bara hjá þeim sem eru að fara í gjaldþrot með nýja greiðsluaðlögunarfrumvarpinu.  Hvatinn til að greiða skuldirnar og reyna að standa sína plikt er enginn.

Það verður að létta af skuldunum og fella niður hluta af höfuðstólnum þannig að fólk sjái einhvern tilgang í að halda áfram að greiða af skuldum sínum.   

Ekki lengja bara í hengingarólinni

Athugasemdir

[Regína Eiriksdottir (IP-tala skráð) 11.3.2009 kl. 09:59]

Fyrirgefðu Eygló en mér var alltaf kennt að ef ég ganrýndi tillögu þá bæri mér að koma með aðra sem væri betri til lausnar

Og ég spyr hvað vilt þú gera til að hjálpa fjölskyldum í landinu?

Hver á að meta hvort um óskynsamlega eyðslu var að ræða eða björgunarskylda?

Hver á að bæta þeim tjónið sem voru grandvarir og tóku ekki þátt í þessu og eru þess vegna ekki skuldsettir upp fyrir haus.

Ertu ekki að gleyma að það voru framsóknarmenn sem komu ungu fólki á kaldan klaka með 90% lánunum

Voru það ekki framsóknarmenn ásamt íhaldi sem vildu leggja niður íbúðalánasjóð!

Tillögur takk ekki tóma gagnrýni

kveðja

Regína

[Eygló Þóra Harðardóttir, 11.3.2009 kl. 10:16]

Sæl Regína,

Ég vil endilega hvetja þig til að lesa efnahagstillögur okkar Framsóknarmanna sem forsætisráðherra hefur ekki gert neitt með annað en að tala niður.  Þær komu fram fyrir nokkru og hafa verið töluvert í umræðunni.  Þar erum við að tala um sömu hluti og Benedikt Sigurðsson og leiðarinn í NYTimes fjallar um til að bjargar heimilunum í landinu.

Tillögur núverandi ríkisstjórnar hjálpa á engan máta þeim sem voru grandvarir og tóku engin lán. Hún ætlar einmitt að leggja bara auknar byrðar á þá, hækka skattana, draga úr þjónustu, og tryggja að verðmæti eigna þeirra minnki enn meira. Og grípur ekki einu sinni til aðgerða sem duga þeim skuldsettustu.

Síðan bið ég þig endilega að kynna þér líka betur málin hvað varðar Íbúðalánasjóð.  Framsóknarmenn hafa alltaf staðið vörð um Íbúðalánasjóð og það er eina ástæðan fyrir því að hann var ekki einkavæddur.  Því við vildum það ekki!

Varðandi 90% lánin, þá hvet ég þig enn á ný til að kynna þér málin.  Þau áttu að koma til á heilu kjörtímabili, miðust alltaf við brunabótamat, ekki markaðsvirði.  Bankarnir ruddust hins vegar inn á markaðinn með 100% lán og miðuðu við markaðsvirði.  Síðan vil ég benda þér á tvær tölur.  Útlán ÍBLsj hljóma upp 650 milljarða, skuldir bankanna hljómuðu upp við hrun upp á fleiri þúsundir milljarða.  Talið er t.d. að engar eignir séu í Landsbankanum þegar búið verður að gera upp bankann.

Ég held að þetta segi okkur skýrt hvort var ÍBLsj/framsóknarmenn sem komu ungu fólki á kaldan klakann eða bankarnir.

bkv. Eygló

[H.Pétur Jónsson (IP-tala skráð) 11.3.2009 kl. 14:51]

Sæl Eygló góð umræða hjá þér.Ég hef verið að koma með tillögu um sparnað í sambandi við húsbankalánin sem eru verðtryggð (best væri að afnema he----is verðtrygginguna )en til að létta greiðslubyrðina þarf að hætta að reikna verðbætur mánaðalega ,það mundi spara fólki umtalsverðum útgjöldum.hversvegna jú þá bætast ekki verðbætur ofaná verðbætur mánaðarlega sem er umtalsverð upphæð á ári,og ég tala nú ekki um hvað myndi sparast á öllum lánstímanum.Miðað við núverandi verðbólgu erum við að tala um hundruði miljóna sem bætast við lánið ef við reiknum verðbætur mánaðarlega.'Eg hef bent fólki á þessa leið og þar á meðal dóttur minni,hún fór í bankann og bað um að fá að greiða af láninu einu sinni á ári en fékk þau svör að það væri ekki hægt hún yrði að greiða lánið upp og greiða uppgreiðslu gjald taka nítt lán með tilheyrandi kostnaði til að hægt væri að breyta láninu.Ég er marg búinn að setja þetta á bloggið en eingin virðist taka undir þetta eða skoða það .Ég hef einnig sent þessa útreikninga á flesta þingmenn og hafa nokkrir svarað og ætla þeir að skoða málið.Ég verð að senda þér útreikninganna sem eru á exel skjali á tölvupósti ég kann ekki að setja hann hér á bloggið þitt En endileg farðu yfir þessa útreikninga og skoðaðu þá vel og vonandi skilur þú hvað ég er að fara .

Meira um verðtryggingu ef fólk vill breyta gjalddögum á sínum lánum og þarf að borga gömlu lánin upp og taka nítt er það bara alt í lagi svo framalega sem það kostar eitthvað sangjarnt.Nú,þegar það tekur nítt lán þá fáum við að taka hluta af láninu sem nemur afborgun í eitt ár setjum þá peninga inná bók sem er lokuð í eitt ár með vöxtum og verðtryggingu sem við síðan notum til að borga af láninu eftir ár.Og á meðan leggjum við inná bók mánaðalega sem svarar afborgun af sama láni með sömu vöxtum og verðtryggingu.Þá erum við búin að verðtryggja okkar peninga til að borga af húsbankaláninu.Þetta gera td.bandaríkja menn leggja peninga inná bók væntan lega með hærri vöxtum en á viðkomandi láni

En albest fyrir alla væri náttúrulega að afnema verðtrygginguna 

[Benedikt Sigurðarson, 11.3.2009 kl. 20:25]

Takk fyrir að benda á þessa ágætu skoðanaskríbenta í New York Times.

Þörf er á öllum rökum og bardaganum.

Ég geri það sem ég get og kann og berst um á hæl og hnakka.

Ákallsbeiðendur frá 11. febrúar sl. um "almennar aðgerðir í þágu heimilanna" . . verðskulda að vera boðaðir á fund hjá forystumönnum Framsóknarflokksins - þó einn og einn hafi laumast inn í raðir frambjóðenda . . .

blogg.visir.is/bensi