Framboð til formanns LFK

Næstkomandi laugardag, 18. ágúst verður haldið í Reykjavík landsþing Landssambands Framsóknarkvenna.  Ljóst er að Bryndís Bjarnason, núverandi formaður LFK, hyggst hætta formennsku.

Ég hef því ákveðið að gefa kost á mér til formennsku í LFK.

Undanfarin ár hef ég tekið mjög virkan þátt í starfi Framsóknarflokksins. Ég var í 4. sæti á lista Framsóknarmanna í Suðurkjördæmi fyrir síðustu tvennar alþingiskosningar og sat um tíma á Alþingi sem varaþingmaður.  Ég hef verið mjög virk í starfi á vegum flokksins og er m.a. ritari Kjördæmissambands Framsóknarfélaganna í Suðurkjördæmi, fulltrúi í miðstjórn Framsóknarflokksins og gjaldkeri Framsóknarfélags Vestmannaeyja.  Að auki hef ég gegnt fjölda trúnaðarstarfa á vegum Vestmannaeyjabæjar, m.a. verið aðalmaður í skólamálaráði, setið í stjórn Nýsköpunarstofu Vestmannaeyja, Visku,- fræðslu- og símenntunarmiðstöðvar og sem stjórnarformaður Náttúrustofu Suðurlands.

Ég hef haft mikla ánægju af störfum mínum fyrir Framsóknarflokkinn og lagt mig fram um að halda málefnum kvenna á lofti.  Innan Framsóknarflokksins  hefur LFK gegnt lykilhlutverki við að tryggja framgang kvenna og málefni er varða konur.  Árangurinn hefur verið ótvíræður.  Hlutfall kynja á listum flokksins og í nefndum á vegum flokksins hefur verið mjög jafnt.  Þannig sátu jafnmargar konur og karlar í fyrstu sætum framboðslista í síðustu tvennum alþingiskosningum og enginn flokkur hefur haft jafnmarga kvenráðherra og Framsóknarflokkurinn. 

Á þessum góða árangri vil ég byggja í samstarfi við stjórn LFK, landsstjórn og Framsóknarkonur um allt land því ég tel að sterk staða kvenna innan Framsóknarflokksins sé lykillinn að framtíð hans.

Athugasemdir

[Salvör Kristjana Gissurardóttir, 16.8.2007 kl. 22:55]

Vona að þú verðir kosinn formaður, þú verður frábær þar! Það hefur verið gaman að fylgjast með hinum öflugu kvennasamtökum innan Framsóknarflokksins og ég hef kynnst miklum valkyrjum í starfinu í Reykjavík t.d. Sigrúnu Sturludóttur, Áslaugu og Sigrúnu Magnúsdóttur. ég hugsa að endurreisn Framsóknarflokksins byggi ekki hvað síst á starfi kvennahreyfingarinnar.

[Albertína Friðbjörg, 17.8.2007 kl. 09:46]

Sæl Eygló,
 mikið lýst mér virkilega vel á að þú bjóðir þig fram og vona svo sannarlega að þú verðir kosin!    Veit ekki enn hvort það hafist hjá mér að mæta, en gangi þér vel á morgun!

[Eygló Þóra Harðardóttir, 17.8.2007 kl. 09:51]

Takk kærlega! Ég vona að ég sjái ykkur báðar á laugardaginn á Hverfisgötunni :)

Bkv. Eygló 

[Jónas Yngvi Ásgrímsson, 17.8.2007 kl. 10:07]

Til hamingju með ákvörðunina og gangi þér sem allra best. Vonandi nærð þú kjöri.