"Niðurskurður" á Landspítalanum??

Tómas Zoëga, yfirlæknir á geðdeildinni á Landspítalanum, sagði í kvöldfréttunum að baðherbergið sem sjúklingur var lagður inn á væri fyrir neðan allar hellur.  Af hverju var hann þá að leggja sjúklingana þarna inn í heila tvo daga? Jú, vegna þess að hann taldi betra að bjóða honum þessa bráðabirgðavistun en að senda hann heim.

Síðan bætti hann við að þetta væri að sjálfsögðu ekki honum sjálfum að kenna, þrátt fyrir að hann væri stjórnandi þarna, heldur niðurskurði.  Væntanlega ætti heilbrigðisráðherra eða formaður heilbrigðisnefndar að vera á staðnum til að stjórna innlögnum, að mati hans og Fréttastofu Stöðvar 2?

Að vísu bætti hann við að menn hefðu séð að sér.

Ég fór að gamni mínu inn á fjárlagavef Fjármálaráðuneytisins og skoðaði hinn mikla "niðurskurð" sem hefur verið í heilbrigðis-og tryggingakerfinu:

Ár     Landspítali                 Heildarútgjöld

2003 Reikningar 25.614     Reikningar 105.817,7

2004 Reikningar 25.905     Reikningar 112.643,6

2005 Reikningar 26.956     Reikningar 118.462,1

2006 Fjárlög 27.902           Fjárlög 126.181,4

2007 Fjárlög 30.190           Fjárlög 143.441,7

Jamm,  - það er gott að geta hnussað yfir 30 milljörðum kr. 

 

Athugasemdir

[Eygló Þóra Harðardóttir, 22.4.2007 kl. 12:23]

Hvernig geturðu fullyrt að þjónustan verði verri og verri?  Ég naut nýlega frábærrar þjónustu á meðgöngudeildinni í heila tvo mánuði og greiddi ekki krónu fyrir.  Góðar vinkonur mínar þurftu að nota þjónustu fyrirburadeildarinnar í enn lengri tíma og fengu þjónustu sem telst vera ein af 2-3 bestu í heiminum.  

OECD mælir okkur yfirleitt nálægt toppnum þegar heilbrigðis- og tryggingakerfi eru borin saman og hvað eru 30 milljarðar annað en vilji til að ekki bara laga það sem laga þarf heldur gera enn betur. 

Gera gott enn betra! 

[Eygló Þóra Harðardóttir, 22.4.2007 kl. 17:18]

Þrymur, ég samhryggist þér með fráfall föður þíns. 

Það er alltaf matsatriði hvernig maður vegur og metur þjónustu.  Ég var send heim nokkrum sinnum áður en ég var endanlega lögð inn.  Senda átti afa minn heim 10 dögum áður en hann lést úr krabbameini. Faðir þinn fór 3-5 sinnum inn á spítala og lést að lokum inn á heilbrigðisstofnun.

Enginn getur sagt til um hvort þú og fjölskyldan þín upplifðu þetta sem slæma eða góða þjónustu, - bara þið getið metið það sjálf. 

Ég held að það verði æ meira um það í framtíðinni að fólk fái val um að deyja heima hjá sér, og fái til þess umönnun heim.  Eflaust munu einhverjir telja það verri þjónustu, á meðan aðrir munu kjósa að deyja heima.

En ég veit að á þessu kjörtímabili hafa verið lagðir umtalsvert meiri fjármunir í heilbrigðis- og tryggingarkerfið eða um 30 milljarðar króna. Ég veit að í samanburði við flest ríki erum við með eitt besta heilbrigðis- og velferðarkerfi í heimi.  

Og ég veit líka að það verður haldið áfram að gera enn betur. 

[erlahlyns.blogspot.com, 22.4.2007 kl. 19:09]

Þú bendir á að þetta séu orð yfirlæknis geðdeildarinnar. Þó að Landspítalinn í heild sinni fái aukið fé er ekki þar með sagt að það fari allt til geðdeildanna. Því vær mun nærtækara að skoða breytingar á milli ára á því fjarmagni sem þessar tilteknu deildir fá. Nú hef ég ekki hugmynd um hverjar þær eru. Kannski hækkaði upphæðinr, kannski ekki. Kannski þú vitir það?

[Eygló Þóra Harðardóttir, 22.4.2007 kl. 19:15]

Fjármunum á fjárlögum er úthlutað til stofnunarinnar.  Svo eru það væntanlega stjórnendur þar sem skipta peningunum niður, og þar hlýtur Tómas Zoëga að koma að málum. 

Hann ætti líka að vera í bestu aðstöðunni til að meta þörf fyrir legupláss, - hann eða aðrir stjórnendur.  Ráðuneytið á að marka stefnuna líkt og t.d. heilbrigðisráðherra  og félagsmálaráðherra hafa gert.

En ef ekki einu sinni þeir sem vinna dagsdaglega með málaflokkinn á stofnunum gátu ekki gert sér grein fyrir þessari tug prósenta aukning í komu, hvernig í ósköpunum ætti fjárveitingarvaldið eða ráðuneytið að geta gert það? 

[Sveinn Hjörtur , 23.4.2007 kl. 00:30]

Mér fannst þessi ummæli læknissins ósmekkleg og kjánaleg.

[Elfur Logadóttir, 24.4.2007 kl. 19:18]

Eygló, þú gerir þér vonandi grein fyrir því að á þessu tímabili og samkvæmt þeim tölum sem þú tilgreinir, hefur hlutfall greiðslna til Landsspítalans af fjárlögum lækkað.

2003: 25,6 af 105,8. Það gera 24,2% af heildarútgjöldum.

2007: 30,2 af 143,4. Það gera 21,1% af heildarútgjöldum. 

Hlutfallið til Landsspítalans hefur því lækkað um 14,7% á þessum 4 árum. Er það ekki niðurskurður?