Hvalveiðar og Bretar

Í frétt á visir.is er sagt frá því að hvalverndunarsamtök í Bretlandi hvetja fyrirtæki og neytendur til að kaupa ekki fisk frá Granda hf.  Ástæðan er að Grandi hf. er í samstarfi við Hval hf. um geymslu á hvalkjöti.  Um 20% af öllum útflutningstekjum Granda koma frá Bretlandi, eða um 2,7 milljarðar króna.  Bretland er jafnframt eitt mikilvægasta markaðssvæði fyrirtækisins.

Stutt er síðan Náttúruverndarsamtök Íslands kynntu skýrslu um kostnað hins opinbera vegna hvalveiðistefnu landsins á tímabilinu 1990-2006.  Kostnaðurinn var áætlaður um 750 milljónir kr. á verðlagi dagsins í dag.  Árið 2005 var hann um 96,5 milljónir kr.  Í skýrslunni var bent á að til samanburðar þá kostar Sjávarútvegsháskóli Sameinuðu þjóðanna okkur 88,8 milljónir kr.  Útflutningsráð hafði 270 milljónir kr. til umráða sama ár, eða bara þrisvar sinnum meira en fór í hvalveiðar það árið.  

Einar K. Guðfinnsson, sjávarútvegsráðherra, fannst skýrslan nú frekar lélegur pappír og að þarna væri fullt af kostnaði sem tengdist hvalveiðum ekki beint.  Hverju svarar hann þeirri frétt um að eitt helsta sjávarútvegsfyrirtæki landsins gæti tapað markaðssvæði sem hefur gefið af sér tæpa 3 milljarða árlega?

Ef til vill að 82% Breta séu bara að misskilja hvalveiðar Íslendinga…

Bresk hvalaverndunarsamtök hvetja stórverslanir til að sniðganga fisk frá HB Granda

Athugasemdir

[Níels A. Ársælsson., 10.4.2007 kl. 11:24]

Líklegast er að Þorsteinn Már, í Samherja hafi látið þessum upplýsingum leka til hvalfriðunarsamtakana bresku. Þarna er á ferðinni aðferðafræði sem hann hefur stundað í tvo áratugi í þeim tilgangi að ná undir sig kvótum viðkomandi fyrirtækja, enda sést í skottið á refnum undan frakkanum í Grandamálinu.

[Ágúst Dalkvist, 10.4.2007 kl. 12:53]

Ertu að meina Eygló að Grandi sé skikkaður til af ríkinu að vera í samstarfi við Hval?????? Skil ekki alveg hvað þú ert að fara með þessu.

Ef Grandi sér sér ekki hag í því að vera í samstarfi við Hval þá hlýtur honum að vera frjálst að hætta því samstarfi, eða hvað?

Er ekki mikið gáfulegra að einkafyrirtæki standi í hvalveiðum í stað þess að ríkið sé að því eins og síðustu ár? Nú ráða bara markaðslögmálin, ef afurðirnar seljast ekki þá er veiðunum sjálf hætt og allir vinna. Er Framsóknarflokkurinn á móti því?????

[Anna Ólafsdóttir (anno) (IP-tala skráð) 10.4.2007 kl. 13:22]

Ég er og hef frá upphafi verið þeirrar skoðunar í hvalveiðimálinu að við séum að fórna meiri hagsmunum fyrir minni. Svo er ekki einu sinni neitt öruggt með kaupanda að þessu hvalkjöti, það gæti jafnvel verið of eitrað til að selja það til manneldis. Mér finnst voða lítil vitglóra í þessu "einkaframtaki" Einars K. Guðfinnssonar ef ég á að segja alveg eins og er, finnst hann hafa farið meira fram af kappi en forsjá í þessu máli. 

[Jóhann F Kristjánsson (IP-tala skráð) 10.4.2007 kl. 14:29]

Sæl Eygló.

Ég er nú einn af þeim sem talað hef gegn atvinnuhvalveiðum allt frá því þær voru stöðvaðar 1989. Engum hefur tekist enn að sannfæra mig um að við þyrftum á þessum veiðum að halda, þvert á móti hafa öll rök hnigið til þess að óráð væri að hefja veiðar að nýju. Ekki hefur þessi andstaða mín verið byggð á neinni sérstakri viðkvæmni fyrir veiðiaðferðum (enda veiðimaður sjálfur), heldur tómri praktík, eitthvað sem sjálfsagt mætti í ljósi aðstæðna nefna raunsæi. En, hvað á sjávarútvegsráðherra að gera? Hann hefur verið dyggur stuðningsmaður þessara veiða og þegar meirihluti þjóðarinnar hrópar "húrra fyrir hvalveiðum" þá er nú erfitt að falla ekki í þá gryfju að nota skjótfengnar vinsældir. Vinsældir eru hins vegar fljótar að dvína þegar alvara lífsins tekur við. Kanski erum við að byrja að sjá afleiðingarnar af þessari ákvörðun. En Einar ber ekki einn ábyrgðina, heldur öll þjóðin með illa grunduðum fagnaðarlátum. 

[Steini Briem (IP-tala skráð) 10.4.2007 kl. 17:49]

HVALVEIÐAR sjávarútvegsráðherra standa engan veginn undir kostnaði, hvernig sem á það skólabókardæmi um heimsku er litið.

Drög að sjálfsmorði liggja nú fyrir landsfundi Sjalla og ég sé að þeir hafa stolið öllum mínum hugmyndum hér en þeir gleymdu auðlindarentunni. Hún kemur fyrir næstu kosningar og þá brosa sjávarbyggðirnar út að eyrum, ekki síst Flateyringar með sín flötu eyru.