82,9% vilja Íbúðalánasjóð áfram

Bankar og talsmenn þeirra innan Sjálfstæðisflokksins hafa lengi haft horn í síðu Íbúðalánasjóðs.  Leynt og ljóst hafa bankarnir unnið að því að koma sjóðnum fyrir kattarnefið, allt frá því að lögsækja sjóðinn fyrir ESA yfir í nánast niðurgreiðslu (að þeirra mati, sjá viðtal við Ásgeir Jónsson – FBL 17. febrúar 2007) á fasteignalánum.  Allt til að komast yfir íbúðarlánin okkar.

Borgar Þór Einarsson, formaður SUS, hefur verið einn þeirra sem hafa haft andúð á starfsemi sjóðsins og talið að best væri að gera sjóðinn að heildsölubanka eða hreinlega leggja hann niður.  Því er ekki að undra að það komi fram ákveðinn pirringur í garð sjóðsins í nýlegum pistli hans um viðhorfskönnun Íbúðalánasjóðs meðal almennings. Í síðustu könnun kom nefnilega fram að 80% af íslenskum almenningi er mjög eða frekar jákvæður gagnvart sjóðnum.  Langflestir eða 82,9% vilja sjá sjóðinn starfa áfram í óbreyttri mynd og aðeins 6,4% vilja sjá bankana taka alfarið yfir íbúðalán.

Eitt af því sem Borgar Þór og ég höfum verið mest ósammála um er sú skoðun hægri manna að best sé að einkaframtakið sjái um nánast alla þætti samfélagsins.  Ég hef ekki séð að einkavæðing Landsímans hafi skilað miklu, ég sé ekki hvernig einkavæðing RÚV ætti að skila betri þjónustu og það er langt frá því að bankarnir njóti sama trausts meðal almennings og Íbúðalánasjóður.

Því styð ég að Íbúðalánasjóður starfi áfram í óbreyttri mynd.

Athugasemdir

[IG (IP-tala skráð) 18.2.2007 kl. 21:30]

Það er mjög skrýtið að Íbúðalánasjóður kaupi skoðanakannanir með því markmiði að hafa áhrif á pólitíkina. Almenningur gerir sér ekki grein fyrir áhrifum Íbúðalánasjóðs og niðurgreiddra lána á húsnæðismarkaðinn. Meðan það er ríkisniðurgreitt fjármagn á húsnæðismarkaðnum verður ekki til eðlilegur leigumarkaður og því neyðist fólk til að kaupa jafnvel þó það vilji það ekki.

Af þessu leiðir að Framsóknarflokkurinn vill koma í veg fyrir að fólk geti leigt sér íbúð á eðlilegum verðum þar sem þeir vilja viðhalda þessum síðasta ríkisrekna banka...

[Eygló Þóra Harðardóttir, 18.2.2007 kl. 22:30]

Einkennileg rök. 

Ég veit ekki betur en að verktakar og þeir sem vilja byggja leiguhúsnæði geti líka fengið lán hjá Íbúðalánasjóði og hafa verið að gera það.  T.d. hefur framboð á sérstöku leiguhúsnæði verið að aukast í Reykjavík einmitt vegna þess að menn hafa verið að byggja til að leigja og hafa getað haft leiguverðið lægra en ef bankarnir væru einráðir á fasteignalánamarkaðnum.

Síðan er ekkert nýtt að stofnanir líkt og fyrirtæki geri kannanir á þjónustustigi sínu og viðhorfi neytenda og almennings til þess.  

[IG (IP-tala skráð) 19.2.2007 kl. 08:44]

Það er ekkert nýtt að stofnanir geri kannanir. Annað mál hvort þær beiti þeim sem áróðurstæki fyrir tilverurétti sínum.
Ég bý í Rvk. og hef alls ekki orðið var við aukið framboð á leiguhúsnæði. Enn er eftirspurnin langt umfram það framboð sem er til staðar og verðlagningin því alveg geggjuð. Verktakar hafa geta fengið lán hjá Íbúðalánasjóði... Af einhverjum orsökum hafa þeir haft takmarkaðann áhuga á því, afhverju skildi það vera??
Það er óþarfi að stökkva upp á nef sér þó að bent sé á einfaldar staðreyndir eins og ég gerði. Málið er að ef viðhalda á ríkisstyrkjum í einhverri grein og menn vilja styðja það þá verður þeir sem setja fram þá stefnu að geta sætt sig við þá galla sem því fylgja. Í tilviki ríkisstyrkja á lánamarkaði fyrir húsnæðislán er gallinn sá að áhrifin á leigumarkaðinn eru mjög slæm, í tilviki ríkisstyrkja og verndar á landbúnað eru afleiðingarnar hátt matvælaverð...

[Maron Bergmann Jónasson, 19.2.2007 kl. 09:30]

Meðan íbúðalánasjóður sat einn að kökunni var hægt að kaupa sér sómasamlega íbúð á 10 - 12 milljónir og hafa það bara nokkuð gott.  Eftir að bankarbir ruddust inn á íbúðalánamarkaðinn er allt í einu þessi sómasamlega íbúð farin að kosta í kringum 20 milljónir.  Til að bæta svo um betur eru vextirnir á íbúðalánum orðnir jafn háir núna og þeir voru áður en bankarnir réðust inn á þennan lánamarkað og íbúðaverð hefur hækkað um 65 - 70 prósent  Ég get bara ímyndað mér hvernig ástandið yrði ef íbúðalánasjóður hyrfi en það ætti hver hugsandi maður að sjá að það yrði hroðalegt ástand ef viðskiptabankarnir hefðu ekki það aðhald sem þeir hafa af Íbúðalánasjóð.

[Hallur (IP-tala skráð) 19.2.2007 kl. 17:40]

 

LÁN ÍLS ERU EKKI NIÐURGREIDD!

Það virðist vera í gangi grundvallarmisskilningur um lán Íbúðalánasjóðs. Þau eru ekki niðurgreidd - eins og óskráður /(IG) heldur fram og hafa ekki verið - nema að mjög takmörkuðu leiti þegar um leiguíbúðir fyrir þá sem eru undir ákveðnum tekju og eignamörkum.

Þá ber einnig að taka fram að ríkissjóður ber engan kostnað af rekstri Íbúðalánasjóðs sem sumir í bloggheimum hafa haldið fram.

Þá má einnig benda á að Íbúðalánasjóður hefur á undanförnum 6 árum lánað til 2500 til 3000 leiguíbúða.

HM

[Eiríkur Kjögx, skuldlaus við Guð og menn (IP-tala skráð) 19.2.2007 kl. 20:27]

Það gengur ekki hnífurinn á milli okkar Íbúðalánasjóðs, enda þótt ég skuldi honum ekki neitt, og megi hann dafna vel og lengi, eins og púkinn á fjósbitanum. Og gangi þér sem allra best sem hans þarfi þjónn, Hallur minn Magnússon, eins og Sansjó Pansa forðum hjá honum Don Kíkóta kallinum. Þær eru margar vindmyllurnar og ég veit að í huga Framsóknarriddarans á efri hæðinni hjá þér breytast þær í risa, kindahópar í óvinaheri og bændastúlkur í fagrar prinsessur.