Allt Framsókn að kenna!

Þetta er stefna Samfylkingarinnar í hnotskurn.  Nýjasta útspilið var í hádegisfréttunum í dag þegar Anna Kristín Gunnarsdóttir veifaði tölum frá Iðnaðar- og Viðskiptaráðuneytinu um flutning opinberra starfa til og frá landsbyggðinni.  Fréttin var kynnt þannig að landbúnaðarráðherra hefði flutt 160 opinber störf landbúnaðarráðuneytisins af 182 í sitt kjördæmi á síðustu 10 árum, á meðan aðeins 12 ný opinber störf hefðu orðið á Vestfjörðum.

Hvað kemur Landbúnaðarráðuneytinu málinu við?  Væri ekki nær að telja upp hvað þingmenn og ráðherrar NV-kjördæmis hefðu gert á síðustu árum.  Nei, hér á enn að reyna slá einhverjar pólitískar keilur á kostnað Framsóknarflokksins.  

Ef við viljum endilega blanda Landbúnaðarráðuneytinu inn í málið þá er einkennilegt að ekki var hægt að minnast á mikinn stuðning ráðherrans við Landbúnaðarháskólann á Hvanneyri og Hólaskóla, sem eru báðir staðsettir í NV-kjördæmi.  Stuðningur sem hefur ekki alltaf vakið mikla hrifningu hjá kjósendum og íbúum í Suðurkjördæmi.

En skoðum aðeins ráðherra NV-kjördæmis:

• Sturla Böðvarsson hefur verið samgönguráðherra frá 1999 og skv. tölum Önnu Kristínar hefur störfum á vegum Samgönguráðuneytisins fækkað um 8,63 í NV-kjördæmi frá 1995-2005. 
  
• Á sama tíma hefur störfum á vegum Félagsmálaráðuneytisins fjölgað um 59,8 undir stjórn ráðherra Framsóknarflokksins Páls Péturssonar, Árna Magnússonar og nú síðast Magnúsar Stefánssonar. 

Fulltrúar hópsins sem stóðu fyrir baráttufundinum á Ísafirði sögðu þá snýst þetta ekki um pólitík eða að stilla landsbyggðarkjördæmunum gegn hvert öðru.  Við sem búum á landsbyggðinni þurfum að standa saman, gegn aðdráttarafli höfuðborgarsvæðisins.  Ekki rífast um hvert störfin fara út á land, heldur krefjast þess að þau fari. 

Því lofa ég Önnu Kristínu að ég skal vera fyrsta manneskjan til að fagna því ef t.d. þingmaður og ráðherra NV-kjördæmis Einar K. Guðfinnsson ákveður að flytja Fiskistofu eða þó það væri ekki nema bara Sjávarútvegsskóli Sameinuðu þjóðanna til Vestfjarða.  En frekar lítið hefur gerst á vettvangi þess ráðuneytis hingað til.  Til stóð að flytja 7 störf í fyrra, 5 í ár, 6 2008 og 6 2009.  Af þeim áttu 2  að fara á Ísafjörð af 7 sem áttu að fara í allt í NV-kjördæmi. 

Því meginmarkmiðið hlýtur að vera að rétta hlut landsbyggðarinnar gagnvart höfuðborgarsvæðinu!

Ekki rífast um hver fær hvað! 

 

 

Athugasemdir

[Ólafur Als, 17.3.2007 kl. 14:27]

Sæl vertu Eygló,

tek undir að pólitískar keylur hafa æði margar verið slegnar á kostnað ykkar, sumar vafalaust verðskuldaðar (getum rætt það síðar...!) en aðrar byggðar á offorsi og götustrákahugsanahætti sem nær langt út fyrir raðir Sf.

Kveðja,

[Guðmundur Ragnar Björnsson, 17.3.2007 kl. 16:02]

Það er alveg hárrétt að landsbyggðarkjördæmin eiga ekki að vera að öfundast hvert út í annað heldur standa saman og þrýsta á aðgerðir í málum landsbyggðarinnar.

[Steini Briem (IP-tala skráð) 17.3.2007 kl. 16:03]

Svona svona, Eygló mín. Af hverju ertu svona æst í dag? Kom eitthvað fyrir? Allir ráðherrarnir í núverandi stjórn verða fluttir út á land eftir kosningarnar í vor, alla vega tveir í hvert kjördæmi, og látnir vinna þar við landbúnað og sjávarútveg, mjólka kýr og gera að fiski. Don't worry, be happy!

[Geiri (IP-tala skráð) 17.3.2007 kl. 16:19]

Það er eðli kommunista að fjölga ríkisstarfsmönnum,og hrósa sér af því,jafnvel þótt þessir ríkisstarfsmenn hafi ekkert að gera.Það er illa komið fyrir Framsóknarflokknum.