Hafnarfjarðarbrandari eða Blaðabrandari!

Elín Albertsdóttir, ritstjórnarfulltrúi Blaðsins fer mikið í leiðara Blaðsins sl. laugardag.  Í leiðaranum  fjallar hún um skýrslu Sameinuðu þjóðanna um loftslagsbreytingar og áhrif þeirra: Auknum fellibyljum, þurrkum, flóðum, hitabylgjum og hækkandi sjávarborð.  Síðan úrskurðar hún um hvern eigi að draga til ábyrgðar.  "Jú, okkur sjálf og þá iðnaðar- og stóriðjustefnu sem viðhöfð hefur verið sl. áratugi." Sem sagt íslenskur almenningur og stjórnvöld bera ábyrgð á loftslagsbreytingunum í heiminum skv. úrskurði ritstjórnarfulltrúans.

Hver er ástæðan fyrir undanþágunni í Kyoto-bókuninni? Hver er ástæðan fyrir því að samtökin Climate Group á 11. aðildarríkjaþingi Loftslagssamningsins í Montreal veittu Íslandi viðurkenningu? Ástæðan er einföld.  Ísland nýtur þeirrar sérstöðu í heiminum að nær öll (99%) orkuframleiðsla nýtir endurnýjanlegar orkulindir, vatnsorku og jarðvarma.  Þetta er draumsýn flestra annarra ríkja, eða eins og kemur fram á vefsíðu WWF,  sem eru að berjast fyrir því að hætta að framleiða rafmagn með kolum.

Þar með er ekki sagt að við getum ekki gert mun betur, - en svona óábyrgur málflutningur í blaði sem vill láta taka sig alvarlega hjálpar engum.  Af hverju er ekki bent á aðgerðir til að draga úr losun í sjávarútvegi og samgöngum? Af hverju er ekki talað um að gera kröfur til Alcan og Alcoa um að binda kolefni með landgræðslu og skógrækt til að vega upp á móti losun þeirra?  Annar möguleiki er að koma á kolefnissjóði sem fyrirtæki gætu fjárfest í, í samræmi við hugmyndir EU um útblástursviðskiptasjóð (Emission Trading System).

Nei, eina lausnin er að hrekja álfyrirtækin úr landi eða hvað? 

 

Athugasemdir

[Tryggvi L. Skjaldarson (IP-tala skráð) 6.2.2007 kl. 16:17]

Svona málflutningur virðist ganga furðu vel í fólk.  Skiptir engu þótt að það sé ljóst að það er erfitt að framleiða ál á vistvænni hátt annarsstaðar.  Og það er líka alveg ljóst að ál verður framleitt áfram af fullum krafti hvort sem við tökum þátt í því eða ekki.

Kveðja Tryggvi L. Skjaldarson

Starfsmaður Alcan

[Eiríkur Kjögx (IP-tala skráð) 6.2.2007 kl. 18:35]

Álver, raflínur, stórvirkjanir og vegir á hálendinu valda alls konar mengun, til dæmis loftmengun og sjónmengun. Auk þess er hér næg atvinna og hægt að skapa atvinnu í framtíðinni sem veldur mun minni mengun en álver gera og allt sem þeim fylgir.